Өзгөндөгү аз камсыз болгон үй-бүлөлөрдөгү окуучулар Ысык-Көлгө жолдомо алышат

Орто мектептердин 11-класстын бүтүрүүчүлөрү тапшыруучу Жалпы республикалык тестирлөөнү ийгиликтүү тапшырып, алдыңкы жогорку баллдарга ээ болгон 5 окуучуга Өзгөн райондук мамлекеттик администрациясы тарабынан ар бирине 20 миң сомдон, жалпысынан 100 миң сом байге катары белгиленген. Бул тууралуу Өзгөн администрациясы кабарлады.

Андагы маалыматка ылайык, окуу процессинде ийгиликтүү жетишкендиктерге ээ болгон окуучуларга, аз камсыз болгон үй-бүлөлөрдөгү окуучу балдарды колдоо максатында жергиликтүү өз алдынча башкаруу органдары Ысык-Көл облусуна жайкы эс алууга жолдомолорду алып беришет.

"Кыргыз Республикасынын президентинин 2021-жылдын 29-январындагы “Инсандын руханий, адеп-ахлактык өнүгүүсү жана дене тарбиясы жөнүндө” №1 жарлыгынын 2-пунктунда көрсөтүлгөн милдеттерди аткаруу жана Өзгөн районундагы жөндөмдүү окуучуларды колдоо жана алардын окуу процессиндеги жетишкендиктерин баалоо иретинде уюштурулду", - деп айтылат маалыматта.