"Кайдасың? - Мен убакыт токтоп, куштардын гана үнү угулган жерде". Бишкектеги кызгалдак талаасынан сүрөттөр топтому

Май айынын кирип келиши менен Кыргыз өлкөсүнүн бүткүл аймагында көздүн жоосун алган кызгалдактар гүлдөй баштаган. Бул кооздукка суктанган Бишкек шаарынын тургундары ажайып кооз жаратылыш фонунда түшкөн сүрөттөрүн социалдык тармактарга жарыялашууда.

SUPER.KG порталы кызгалдак талааларында түшкөн сүрөттөрдүн топтомун окурмандарга сунуштайт.

Кызгалдактын 100дөн ашык түрү окумуштуулар тарабынан аныкталган. Кыргыз өлкөсүндө анын 70тен ашык түрү бар.

Голландия жоогазындары менен, Франция лаванда ландшафтары менен, ал эми Кыргыз өлкөсү кызгалдак талаалары менен суктантат.

Май айы - тоолордун боорлору кызыл түскө боёлуп жаркыраган сыйкырдуу учурду кармаганга ылайыктуу учур.

Кызгалдак гүлдөгөн талаалар чыгармачыл адамдар үчүн шыктануу булагы болуп калды.

Кызгалдак гүлү апийим тукумуна таандык, ал көп жылдык өсүмдүк.

Кооз сүрөттөр үчүн адистер гүлдөрдү үзбөөгө үндөшөт. Кызгалдактар быйыл бардык талааларда гүлдөп, бир жылдан кийин такыр гүл ачпай коюушу мүмкүн.

Кызгалдак гүлдөгөн талаа бойлой өткөн дээрлик ар бир унаа кызыл талаалардын укмуштуудай кооздугун чагылдыруу үчүн токтойт.

- Сен кайдасың?

- Мен? Мен чексиз бош мейкиндикте жүрөм. Убакыт токтоп, куштардын гана үнү угулган жерде, ал жерде жалаң гана кызгалдактар бар.

Гүл десте теремин,
апама беремин.
Ал менин майрамга,
арнаган белегим!

Кызгалдактар биз билген кызыл гана түстө боло бербейт, ак жана сары түстөрү да кездешет.

Кызгалдактар - кызыл өңү талаанын,
Кызыктырат кыялындай баланын.
Тынчтык күнгө ынтымакты чакырып,
Тыңшагансыйт биримдиктин кадамын.

Кызгалдактар кызылындай кырмандын,
Кылымды ырдап ыргал, ыргал, ыргалгын!
Өткөн күндөн эртеңки күн бай болуп,
Өсө берсин эл-жерибиз жылдан-жыл! (Бактыгүл Чотурова).