Жалпы республикалык тестирлөө 115 борбордо өткөрүлүүдө

Республиканын бардык аймактарында 18-майда Жалпы республикалык тестирлөө башталды. Тест окуучулардын өмүрүнүн жана ден соолугунун коопсуздугун камсыздоо үчүн тийиштүү шарттар түзүлгөн 115 тестирлөө борборунда өткөрүлүүдө. Бул тууралуу Билим берүү жана илим министрлигинин басма сөз кызматынан билдиришти.

Тестирлөө борборлорунда медициналык пункттар жана медицина кызматкерлери, ошондой эле коопсуздук кызматкерлери иштеп жатышат. Тестирлөөнүн катышуучулары зарыл коргонуу каражаттары: санитайзер, тепловизор, бет кап, кол кап жана башкалар менен камсыздалган.

Билим берүү жана илим министрлигинин 2021-жылдын 30-апрелиндеги №564/1 буйругуна ылайык, тестирлөө 3 этапта өткөрүлөт:

I этап — 2021-жылдын 18-19-майында;

II этап — 2021-жылдын 21-22-майында;

III этап — 2021-жылдын 22-23-июнунда.

Билимди баалоо жана окутуу усулдары борборунун маалыматы боюнча, ЖРТга 42 миң 817 бүтүрүүчү катталган.Тестирлөөгө орто жалпы же орто кесиптик билими бар Кыргыз Республикасынын жарандары, ошондой эле каттоо учурунда жалпы билим берүүчү мектептердин 11-классында, орто жана башталгыч кесиптик билим берүү уюмдарынын акыркы курстарында окуп жаткандар катыша алат.