Орусия Тажикстанга чек ара заставасын курууга көмөктөшөт

Жакында Орусия менен Тажикстан өкмөттөр аралык келишимге кол коюшат, ага ылайык Орусия Федерациясы тажик-афган чек арасында заманбап чек ара заставасын курууга көмөктөшөт. Бул тууралуу Орусиянын тышкы иштер министри Сергей Лавров Тажикстандын тышкы иштер министри Сирожиддин Мухриддин менен сүйлөшүүлөрдөн кийин орус басылмаларына билдирди.

Маалыматка ылайык, Орусиянын Куралдуу күчтөрүнүн катышуусу менен антитеррордук машыгуулар үзгүлтүксүз өткөрүлүп турат жана жакынкы аралыкта өкмөттөр аралык келишимге кол коюлат.

"Тажикстандагы Орусиянын 201-аскер базасы Борбор Азиянын туруктуулугун жана коопсуздугун камсыз кылуучу маанилүү фактор болуп саналат. Терроризмге, экстремизмге жана баңгизаттарынын мыйзамсыз жүгүртүлүшүнө каршы бардык зарыл жардамдарды көрсөтүүгө даярбыз жана аны иш жүзүндө колдонобуз", – деп билдирген Лавров.