Өлкө аймагында кыргыз-орус билим берүү уюмдарын куруу маселелери талкууланды

Бүгүн, 25-майда видео конференция байланыш режиминде билим берүү жана илим министри Болотбек Купешевдин Орусия Федерациясынын агартуу министри Сергей Кравцов менен жолугушуусу болду. Бул тууралуу министрликтин маалымат кызматынан билдиришти.

Маалыматка ылайык, жолугушуунун жүрүшүндө бир катар маселелер боюнча толук пикир алмашуу жүрдү, атап айтканда Кыргыз өлкөсүнүн аймагында биргелешкен кыргыз-орус билим берүү уюмдарын куруу, республиканын таланттуу жана зээндүү балдары үчүн "Артек" эл аралык балдар борборунда жайкы эс алууну уюштуруу маселелери талкууланды.

Болотбек Купешев жолугушуу үчүн ыраазычылык билдирип, узак мөөнөттүү жана эффективдүү иштөө форматындагы кызматташтыкты андан ары өнүктүрүүгө жана кеңейтүүгө үмүт артып жатканын айтты.

Жолугушуунун жыйынтыгында тараптар бардык маселелерди сапаттуу жана ыкчам иштеп чыгуу максатында ушул сыяктуу жолугушууну такай өткөрүп турууну макулдашты.