"Жер-Үйдөн" бюджетке бир айда 140 миллион сомдон ашык каражат түштү

Таластагы "Жер-Үй" алтын кенинде өндүрүш башталгандан кийинки биринчи айда бюджетке төлөмдөрдүн негизги үч түрү боюнча 140 миллион сомдон ашык каражат түштү. Бул тууралуу кенди иштеткен “Альянс алтын” компаниясынын сайтында жарыяланды.

Маалыматка ылайык, апрель айында "Альянс Алтын" компаниясы киреше салыгы үчүн төлөмдөрдү жүзөгө ашырды, роялти төлөдү жана инфраструктураны өнүктүрүүгө каражат которду. Жергиликтүү инфратүзүмдү өнүктүрүүгө төлөнгөн акча комбинат тапкан кирешенин 2 пайызын түзөт. Аны үч фонддун ортосунда бөлүштүрөт. 50 пайызы облусту, 30 пайызы районду өнүктүрүү фондуна кетет. Калган 20 пайызы кен чыккан жердеги жергиликтүү бюджетке чегерилет.

"Жер-Үй" көлөмү боюнча өлкөдө Кумтөрдөн кийинки 2-орунда турат. Геологиялык баштапкы иликтөөлөргө ылайык кенде 84 тонна алтын, 25 тоннадан ашуун күмүштүн запасы бар. Жалпысынан Жер-Үй кенин иштетүүдөн мамлекеттик бюджетке (республикалык + жергиликтүү) жыл сайын 4 миллиард сомго чейин салык жана башка чегерүүлөр түшөт.