Баткенде Куралдуу күчтөрүнүн күнүнө карата концерт уюштурулду

Баткен шаарында 29-май Куралдуу күчтөрүнүн күнүнө карата майрамдык концерт уюштурулду. Бул тууралуу өкмөттүн Баткен облусундагы өкүлчүлүгүнөн билдиришти.

Билдирүүдө айтылгандай, салтанаттуу иш-чарага өкмөттүн Баткен облусундагы ыйгарым укуктуу өкүлү Абдикарим Алимбаев катышып, чек арачылар менен аскер кызматкерлерин кесиптик майрамдары менен куттуктады.

"Эки өлкө менен чектеш жайгашкан Баткен облусунда кызмат өтөп жаткан чек арачылар менен аскер кызматкерлери, чыныгы мекенчилдик, эрктүүлүк, тайманбастык сапаттарга ээ экенин баса белгилегим келет. Ар бириңиздердин аракетиңиздер менен кыргыз элинин бүтүндүгү сакталып, мамлекеттүүлүк чыңдалып турат. Күн-түн дебей, күчөтүлгөн тартипте чек араны кайтарып, мамлекет алдындагы ыйык милдетиңиздерди жогорку деңгээлде аткарып, ар намыстуулуктун үлгүсүн көрсөтүп жатасыздар. Сиздерге алкыш айтып, таазим этебиз”, - деди Алимбаев.