Баткен облусунун чек ара аймактарында мобилдүү топтор 4 аткезчилик фактысын аныктады

Баткен облусунун аймагында мобилдүү топтор 4 аткезчилик фактысын аныктады. Бул тууралуу Баткен облустук администрациясынын басма сөз кызматынан кабарлашты.

Маалыматка ылайык, Баткен облусунун чек ара аймактарында аткезчиликке бөгөт коюу максатында мобилдүү топтор, жергиликтүү ыктыярчылар иш алып барууда.

"Мобилдүү топ ишке киришкен 10 күн аралыгында чек ара аймактарынан 4 аткезчилик фактысы аныкталды. Кармалган жарандар мыйзамсыз жол менен кошуна мамлекеттерге жүк өткөрүүнү көздөгөн. Кармалган жүктөр негизинен жашылча-жемиш, азык-түлүк жана турмуш-тиричиликке керектүү ар түрдүү материалдар экени аныкталып, бажы кызматына өткөрүлүп берилди", - деп билдиришти аталган мекемеден.

Учурда УКМК, бажы, ички иштер кызматы, салык кызматтарынан турган мобилдүү топтор Баткен жана Лейлек райондорунун чек ара аймактарын көзөмөлгө алууда.

Белгилей кетсек, 21-майда облустун чек ара аймактарында, кошуна өлкөлөргө мыйзамсыз өтүп жаткан аткезчилик фактыларына каршы күрөшүү, мобилдүү топторду түзүү боюнча администрациядан атайын буйрук чыккан.