Тышкы иштер министри Руслан Казакбаев Тажикстандын Кыргыз өлкөсүндөгү элчисин кабыл алды. Эмне маселе талкууланды?

Бүгүн, 31-майда тышкы иштер министри Руслан Казакбаев Тажикстандын Кыргыз өлкөсүндөгү элчиси Назирмад Ализоданы кабыл алды. Бул тууралуу аталган министрликтин басма сөз кызматы кабарлады.

"Жолугушуу тажик тараптын демилгеси менен уюштурулду. Маектешүүнүн жүрүшүндө кыргыз-тажик өз ара аракеттенүүсүнүн актуалдуу маселелери боюнча пикир алмашуу орун алды.

Кыргыз өлкөсү менен Тажикстандын чек арага чектеш аймактарында тынчтыкты жана туруктуулукту сактоо үчүн зарыл болгон чараларды кабыл алууга өзгөчө басым жасалды. Апрель айында болгон кайгылуу окуялардын контекстинде министр Казакбаев достук мамилелерин бекемдөөгө жана боордош өлкөлөрдүн ортосундагы куралдуу кагылышууларды болтурбоого өбөлгө түзүүгө чакырылган Бишкектеги жана Дүйшөмбүдөгү эки мамлекеттин дипломатиялык өкүлчүлүктөрүнүн башчыларынын жоопкерчиликтерин жана дипломаттардын алдыңкы ролун өзгөчө басым менен белгиледи", - деп жазылат билдирүүдө.

Руслан Казакбаев кыргыз-тажик мамлекеттик чек ара линиясынан өтүүсүн кыска мөөнөттө ар бир тараптын кызыкчылыктарын эске алуу менен сүрөттөө боюнча практикалык натыйжаларга жетишүүгө кыргыз тарап кызыкдар экендигин баса белгиледи.

Ошондой эле эки мамлекеттин аймактарында Кыргыз өлкөсү жана Тажикстандын жарандарынын мыйзамдуу туруусуна тиешелүү маселелер талкууланды.