Экс-депутат Талант Узакбаев кармалды

"Кумтөр" долбоорун ишке ашырууда коррупция фактысы боюнча Жогорку Кеңештин мурдагы депутаты Талант Узакбаев кармалды. Бул тууралуу Улуттук коопсуздук боюнча мамлекеттик комитетинен билдиришти.

Билдирүүгө ылайык, экс-депутат бүгүн, 31-майда кармалды.

"Кумтөр" кенин иштетүү боюнча долбоордун ар кандай баскычтарында коррупция боюнча козголгон кылмыш ишинин алкагында ведомстволор аралык тергөө тобу ушул кылмыш ишине тиешеси бар адамдардын катышуусунда тергөө иш-аракеттерин улантууда.

Бир катар тергөө иш-аракеттеринен кийин Кыргыз Республикасынын Кылмыш-жаза кодексинин 319-беренесинин 2-бөлүгүндө (Коррупция) каралган кылмышка шектелип, Жогорку Кеңештин экс-депутаты Т.Узакбаев кармалды", - деп жазылат маалыматта.

Улуттук коопсуздук мамлекеттик комитети бул кылмыш ишин иликтөөнүн жүрүшү жана натыйжалары жөнүндө коомчулукка маалымат берип турат.