Меридианна, Ыпып... Өлкөдө наристелерге ыйгарылган эң көп жана сейрек кездешүүчү ысымдар аталды

Акыркы 5 ай аралыгында наристелерге ыйгарылган сейрек жана популярдуу болгон ысымдар белгилүү болду. Өлкөнүн Мамлекеттик каттоо кызматы 2021-жылдын 5 айынын жыйынтыгын чыгарып, анда балдарга эң көп коюлган ысымдар Мухаммед жана Раяна экенин маалымдады.

Белгилүү болгондой, эркек балдардын арасында эң көп кездешүүчү 10 ысымдын ичине Умар, Рамазан, Али, Алихан, Алинур, Билал, Нурислам, Амир жана Эмир кирет. Ал эми кыздар арасында Салиха, Амина, Фатима, Айлин, Алия, Хадича, Аруузат, Сафия жана Арууке деген ысымдар көп ыйгарылды.

"Кыздарга популярдуу ысымды тандоодо артыкчылык 2016-жылдан бери дээрлик өзгөргөн жок. Раяна ысымы бешинчи жыл катары менен алдыңкы орунда келе жатса, 6 жылдан бери жаңы төрөлгөн эркек балдар арасында эң популярдуу болгон ысым Умар бул жылы бир орунга ылдый түштү. Мухаммед ысымы биринчи орунга ээ болуп, 1449 ата-эне ымыркайларына Мухаммед деп ат коюшкан, бул Умардан (1418) 31ге көп", - деп айтылат мекеменин билдирүүсүндө.

Балдарды коргоо күнүнө карата Мамлекеттик каттоо кызматы балдар жөнүндө кызыктуу цифраларды даярдады. Кыргыз кыздарынын ата-энелеринин арасында популярдуу болгон адаттан тыш ысымдар: Ханбийке, Меридианна, Фея, Киара жана Сүйүү, ал эми балдар үчүн Атилла, Ыпып, Рамос, Сталин жана Хантеңирим.

Сейрек кездешкен ысымдар: Ассмо, Хаял, Сюита, Айел, Жанай, Чүрөк, Айлуу, Таңсулуу, Акылчач жана Аймелек (кыздар арасында), Назым, Эркебулан, Аймин, Тениз, Байрас, Кычан, Жалын, Бегим, Аяан, Улутман (балдар арасында).

Ушул жылдын 5 айында 52 миң 469 балага туулгандыгы боюнча каттоо жүргүзүлдү. 52 миң 541 жаранга бала төрөлгөндө бир жолку төлөм "балага сүйүнчү" (статистикага сүйүнчү пулду бала төрөлгөндө ала албай, бир канча убакыт өткөндөн кийин алгандар дагы кирет) берилди.