Бишкек: Маршруттук каттамдын айдоочулары эртең дагы жумушка чыкпай тургандыктарын айтышты

Бишкек шаарында иш таштаган маршруттук таксинин айдоочулары эртең, 3-июнда дагы каттамдарга чыкпайт. Бул тууралуу SUPER.KG порталына Көк-Жар конушунда чогулган айдоочулар билдирди.

Алардын айтымында, шаар мэриясына караштуу транспорт башкармалыгы менен маршруттук таксилерди тейлеген компания өкүлдөрү бааны көтөрүүнү сентябрь айына калтырууну сунуштаган.

“Биз эртең дагы каттамга чыкпайбыз. Эгер жол акыны көтөрбөсө бир жумага чейин чыкпай деле коё беребиз. Учурда биздин 10 сом менен каттамга чыкканыбыз эч нерсени актабай жатат, биз унааларыбызды оңдото албай калдык”, - дешти айдоочулар.

Белгилей өтсөк, бүгүн, 2-июнда борбор калаада маршруттук таксилер жол акысын көтөрүү максатында каттамга чыккан эмес. Мэриядан саат 11:00дөн тарта каттамдар калыбына келтирилери айтылган болчу.