"Орхан Инанды табылсын" деген талап менен чыккан митингчилердин алдына депутаттар чыгышты

Бишкекте "Орхан Инанды табылсын" деген талап менен үчүнчү жолу митинг өтүүдө. Чогулгандар "Сапат" лицейинин негиздөөчүсү Орхан Инандынын табылуусун жана анын жоголуусуна байланыштуу суроолорго так жооп алууну талап кылышууда.

Учурда митингге чыккандардын алдына депутаттар Шайлообек Атазов, Самат Исманов, Нурбек Тотонов чыгышты. Алар Орхан Инандыны табуу үчүн колунан келген бардык иштерди аткарарын айтышты.

"Кыргыз жаранынын уурдалышы бул эл аралык беделибизди түшүрөт. Сөзсүз түрдө табылышы керек. Биз Жогорку Кеңеште бүгүн Орхан Инандыны тууралуу маалымат угабыз. Анын табылышын талап кылабыз. Биздин да балдарыбыз "Сапаттын" лицейлеринде окушат", - деди Шайлообек Атазов.

Окуянын чоо-жайы:

1-июнь күнү болжол менен саат 4:20да 102 кызматына 12-кичи районундагы көп кабаттуу үйлөрдүн биринде Lexus 470 үлгүсүндөгү унаасынын эшиги ачылып, ичинде ээси жок бош турганы тууралуу билдирүү келип түшкөн. Милиция кызматкерлери айтылган дарекке барганда Орхан Инандынын баласы арыз менен кайрылган. Анда атасы 31-майда кечки саат 18:00дө байланышка чыккан бойдон дайынсыз экенин жазган.

Бул маселеге байланыштуу 1-июнда "Сапат" лицейинин өкүлдөрү маалымат жыйын өткөрүштү. Жыйында жактоочу Зоотбек Кудайбергенов унаа табылганда, ичинде Орхан Инандынын баалуу буюмдары (акча, эки уюлдук телефону, документ жана башка) калганын айтып, алардын башка кызыкчылыгы болушу мүмкүн деген божомолун билдирди.

Анын айтымында, Орхан Инандыны Бишкекте кармап турушат деген дагы версия бар, бирок бул маалымат тактала элек.

"Ал эч качан саясатка аралашкан эмес. Буга чейин коркутуулар деле болгон эмес. Азыр алдын ала жыйынтык чыгарууга эрте. Көптөгөн ар кандай варианттар айтылып жатат. Биз тергөөнүн жүрүшүнө байланыштуу азыр кандайдыр бир так маалымат бере албайбыз", - деп билдирген ал.

Октябрь райондук милициясынан ички иштер органдарынын аймактык бөлүмдөрүнө багыттамалар берилгенин, издөө жана иликтөө иш-чаралары тынымсыз жүргүзүлүп жатканын билдиришти.

Көп өтпөй дайынсыз болуп жаткан Инандыны табууга президент Садыр Жапаров кошумча күч тартууну тапшырган.

Белгилей кетсек, 1-июнь күнү дагы аталган билим берүү мекемесинин өкүлдөрү митингге чыгып, "Кыргыз өлкөсүндөгү Түркиянын элчиси чыгып, окуяга комментарий берсин" деген талап менен чыгышкан.

Кечээ, 2-июнда дагы Орхан Инандынын жоголуусунан улам экинчи митинг өткөн.