Маршруттук таксинин айдоочулары шаар тургундарына кайрылуу жасашты

Бишкек шаарында маршруттук таксилерде иштеген айдоочулар шаар тургундарына кайрылуу жолдошту. Айдоочулардын айтымында, алар май айында эле иш ташташмак, бирок чек арадагы жаңжалга байланыштуу июнь айына калтырышкан.

"Жол акысына болгон баа 12 жылдан бери көтөрүлбөй келе жатат. Унаанын тетиктери, күйүүчү май кымбат болууда. 80 пайыз айдоочулардын насыялары бар. Биздин төккөн салыктар борборду көрктөндүрүүгө жумшалат. Ал эми автобустар өзүлөрүн актай албай отурат. Автобустар эч кандай салык төкпөйт. Эл дагы бизди туура түшүнүшү керек. Бүгүнкү күндө биз киреше таппай калдык. Биз мэриядан бир сом дагы албайбыз, баарын өзүбүз жасап жатабыз. Батирлерде жашаган балдар бар, аларга да кыйын болуп калды. Шаардык кеңештин эски депутаттары чогулуп, баа маселесин чечип берсе жакшы болмок", - деди чогулган айдоочулардын бири.

Маалымат үчүн:

Кечээ, 2-июнда борбор калаада маршруттук таксинин айдоочулары жол кире тарифин жогорулатуу талабын коюп, каттамга чыкпай коюшкан. Бүгүн дагы каттамга чыкпай, учурда калаада троллейбус жана автобустар гана иш алып барууда.