Бишкектин мэринин милдетин аткаруучу: "Маршруттук таксилердин айдоочуларынан сентябрга чейин убакыт сурап жатабыз"

"Маршруттук таксилердин айдоочуларынан сентябрга чейин убакыт сурап жатабыз", - деп бүгүн, 4-июнда Жогорку Кеңештин жыйынында Бишкек шаарынын мэринин милдетин аткаруучу Бактыбек Кудайбергенов билдирди.

Ал каттамга чыкпай жаткан кичи автобустардын өкүлдөрү менен жолугушканын маалымдады. “Алар жол кире акысын 15 сомго көтөрүүнү талап кылышууда. Биз алар менен сүйлөшүүгө аракет кылдык, бирок алар каттамга чыкпоону улантышууда. Анткени мэрия коомдук транспорттордун акысын көтөрүүгө укугу жок. Жол киренин көлөмүн аныктоо маселесин шаардык кеңеш карайт. Сентябрга чейин убакыт сурап жатабыз. Бирок алар тездетүүнү талап кылышууда. Башка унааларды да тартууну көздөгөнүбүз менен коопсуздук маселеси болууда”, - деди ал.