"Орхан Инанды табылсын". Митингдин катышуучулары БУУнун имаратына чейин жөө жүрүшкө чыкты

"Орхан Инанды табылсын" деген талап менен өтүп жаткан митингдин катышуучулары бүгүнкү митингди жыйынтыктоо үчүн Бишкектеги БУУнун имаратына чейин жөө жүрүш өткөрүп, алар ошол жерден таркап кетишерин айтышты.

Учурда алар өкмөт үйүнүн алдындан жүрүштү баштады.

Буга чейин "Сапат" билим берүү мекемесинин негиздөөчүсү Орхан Инанды дайынсыз болуп изделип жатканы кабарланган.

Анда 1-июнь күнү болжол менен саат 4:20да 102 кызматына 12-кичи районундагы көп кабаттуу үйлөрдүн биринде Lexus 470 үлгүсүндөгү унаасынын эшиги ачылып, ичинде ээси жок бош турганы тууралуу билдирүү келип түшкөн. Милиция кызматкерлери айтылган дарекке барганда, Орхан Инандынын баласы арыз менен кайрылган. Анда атасы 31-майда кечки саат 18:00дө байланышка чыккан бойдон дайынсыз экенин жазган.