Чек ара: Чоң-Алайдагы эл каякка эвакуацияланууда? ӨКМнын жообу

Чоң-Алай районунун Тажикстан менен болгон чек арага жакын аймактарындагы айылдардын эли мектептерге, лицейге, мечиттерге эвакуацияланууда. Бул тууралуу Өзгөчө кырдаалдар министрлигинин басма сөз кызматынан билдиришти.

"Өзгөчө кырдаалдар министри Бообек Ажикеев Ош облусунун Чоң-Алай районундагы түзүлгөн кырдаал боюнча башында туруп, эвакуация уюштуруу иштерин жеке көзөмөлүнө алып жүргүзүүдө. Учурда ӨКМ Ош облусунун Чоң-Алай районундагы түзүлгөн кырдаал боюнча Чоң-Алай районунун Жекенди айыл аймагынын Кара-Тейит, Кара-Мык, Жекенди, Чулук жана Шибе айылдарынын тургундарын саат 19:30дан тартып, Дароот-Коргон айылындагы А.Сайит атындагы орто мектептин, А.Мурзакулов атындагы орто мектептин, №44 кесиптик лицейдин, Борбордук мечиттин имаратына эвакуациялап баштады.

Эвакуация иштерине ӨКМнын райондук бөлүмү, Чоң-Алай районунун жетекчилик курамы, көчүрүү комиссиясы жана жарандык коргонуу комиссиясы толук тартылды. КР ӨКМнын Чоң-Алай райондук бөлүмүнүн өздүк курамы жарандарды жайгаштыруу иштерин уюштурууда", - деп жазылат билдирүүдө.

Мындан сырткары ӨКМ гуманитардык жардам боюнча да иш-чараларын уюштуруп баштады. Бардык тургундарды жайгаштыруу иштери ӨКМ министринин тыкыр көзөмөлү алдында жүрүзүлүп турат.