Президент жакын арада соттук реформа боюнча мыйзам долбоорлорунун пакетин сунуштайт

Президент Садыр Жапаров жакын арада соттук реформа боюнча мыйзам долбоорлорунун пакетин сунуштайт. Бул тууралуу ал бүгүн, 7-июнда сот жана укук коргоо ишин өркүндөтүү маселелери боюнча кеңештин биринчи жыйынында билдирди.

Садыр Жапаров алдыдагы сот жана укук коргоо ишин өркүндөтүү боюнча реформаларды ишке ашырууда Жогорку Кеңеш чоң роль ойноорун белгиледи.

"Жаңы Конституциянын сот системасын жөнгө салуучу нормаларын ишке ашыруу максатында жакын арада соттук реформа боюнча мыйзам долбоорлорунун пакетин сунуштайм. Бул сот органдарынын структуралык өзгөртүүлөрүн тездетүү, сот өндүрүшүнүн эффективдүүлүгүн күчөтүү, сот адилеттиги боюнча жаңы кеңешти, судьялар кеңешин түзүү үчүн зарыл", - деди ал.

Мындан улам ал ушул мыйзам долбоорлорун кезексиз карап берүү боюнча Жогорку Кеңешке кайрылды.