Чет элдик жарандарга Сауд Арабиясына ажылыкка барууга тыюу салынды

Коронавируска байланыштуу быйыл да чет элдиктерге ажыга барууга тыюу салынды. Бул тууралуу чет элдик басылмалар жазышты.

Маалыматка ылайык, пандемиянын шартында Сауд Арабиясынын бийлиги быйыл Меккеге зыяратка баруучулардын санын 60 миң адамга чейин чектөө чечимин кабыл алган. Аталган өлкөнүн гана мусулмандары ажылык милдетин аткара алышат, алардын бардыгы COVID-19га каршы эмдөөдөн өтүшү керек.

Жаңы эрежелерди Сауд Арабиясынын Ажылык жана умра иштери министрлиги жарыялаган. Ажылыкка бара турган бардык жарандар 18 жаштан 65 жашка чейин жана өнөкөт оорулардан алыс болушу керек.

Сауд Арабиясында 460 миңден ашуун адам коронавирусту жуктуруп, 7 миңден ашуун адам көз жумган. 2020-жылы падышалыктын бийлиги ажылыкка чет өлкөлүк зыяратчыларды киргизбей койгон.