Суу чарба агенттигинин директоруна сөгүш жарыяланды

Министрлер кабинетинин төрагасы Улукбек Марипов сугат маселесин чечүү маанилүү экенин айтты. Бул тууралуу ал Чүй облусуна болгон жумушчу сапарынын жыйынтыгы боюнча жолугушуу учурунда айтканын министрлер кабинетинин басма сөз кызматынан билдиришти.

"Дыйкандар сугат суунун жоктугун билдирип жатышат. Мен аларды түшүнөм. Суунун жетишсиздиги түшүмдүн начар болушуна учурашын билдирет. Мындан алыс болушубуз керек. Маселе Чүй дарыясынын каптал куймаларынын тоо булактарынан азайышынан улам келип чыккан. Ошондуктан батыш багытта БЧК каналынын боюнда сугат суусу тартыш болду. Бирок биз дагы чечишибиз керек болгон башка көйгөйлөр бар деп ишенем. Суунун жоктугун айтууга болбойт. Мол түшүм алуу үчүн биз дыйкандарды керектүү көлөмдө суу менен камсыз кылышыбыз керек. Бул азык-түлүк коопсуздугу маселеси”, - деди Улукбек Марипов.

Жыйындын жүрүшүндө Айыл, суу чарба жана регионалдык өнүгүү министрлигинин алдындагы Мамлекеттик суу чарба агенттигинин директору Алмаз Сокеевге сөгүш жарыяланды. Министрлер кабинетинин төрагасы долбоордук сунуштарды тез арада иштеп чыгуу үчүн сугат тармагын жакшыртуу боюнча сунуштарды тез арада киргизүүнү тапшырды.