Парламентте "Лотереялар жөнүндө" мыйзамды өркүндөтүү демилгеси каралды

Парламентте "Лотереялар жөнүндө" мыйзамды өркүндөтүү демилгеси каралды. Бул тууралуу Жогорку Кеңештин басма сөз кызматынан билдиришти.

Депутат Гүлшат Асылбаеванын айтымында, эл аралык тажрыйбада мамлекеттик лотерея оюну мыйзамдуу кыйла кирешелүү тармак болуп эсептелет, бирок биздин улуттук мыйзамда "электрондук лотерея ойнотуу" түшүнүгү камтылбай калган, ошондон улам иштеп жаткан мыйзамга тийиштүү өзгөртүүлөрдү зарылчылыгы жаралган.

"Эл аралык тажрыйбада лотереядан түшкөн каражат социалдык көйгөйлөрдү чечүүгө жумшалат. Ал эми электрондук лотерея ойнотуу усулу аны коомдук жайларда жүргүзүүгө караганда кыйла арзан жана жөнөкөй болгондуктан каражаттын үнөмдөлүшүнө алып келет. Мыйзам долбоорун иштеп чыгуунун жүрүшүндө министрлер кабинетинин сунуштамалары да эске алынды", - деп кошумчалады Гүлшат Асылбаева.

Мамлекеттик лотерея компаниясынын башчысы буга чейин лотерея оюнун уюштурууга анчалык маани берилбей келгендиктен чыгашага учурап, жылына 7 миллион сом өлчөмүндө чыгаша тартып келгенин айтты. Ошондон улам мурдагы жетекчилер жумуштан бошотулуп, жаңы жетекчилер дайындалды.