Коронавирус: Бишкектин бардык райондору "кызыл зонага" кирди

Эпидемиологиялык кырдаалга байланыштуу Бишкек шаарынын бардык райондору "кызыл зонага" киргизилди. Бул тууралуу борбор калаанын мамлекеттик санитардык-эпидемиологиялык көзөмөлдөө борборунун башкы дарыгеринин орун басары Айнагүл Рыскулбекова маалымат жыйында билдирди.

"Апрель айынын башында шаардын эки району гана "кызыл зонада" болгон. Азыр баары "кызыл зонага" кирди. Ошентип өткөн суткада Ленин районунда 141, Биринчи Май районунда - 65, Октябрь - 71, Свердлов районунда - 50 учур катталды. Статистикалык маалыматтарга ылайык, оорулардын 60 пайызы 30 жаштан 64 жашка чейинкилер. Көбү иштегенин айтпайт. Ошон үчүн жарымы иши жок деп катталган", - деди ал.

Жыл башынан бери борбор калаада 16 миң 857 адам коронавирус жана жугуштуу пневмония оорусун жуктургандыгы кошумчаланды.

Эске салсак, Бишкекте 17-июндан баштап көңүл ачуучу жайлардын ишине чектөөлөр киргизилери айтылган. Ага ылайык, түнкү клубдар, ресторандар, коомдук тамактануу түйүндөрү, кафелер, караоке, барлар саат 23:00дөн 07:00гө чейин жабылышы керек.