"Иш берүүчү паспортторун алып койгон". Бурятияда укугу бузулган 6 Кыргыз жаранына жардам берилди

Бурятияда мыйзамсыз кармалып, укугу бузулган 6 Кыргыз жаранына жардам көрсөтүлдү. Учурда алар Улан-Удэ шаарындагы мейманканага жайгаштырылып, диаспоралар тарабынан бардык жардамдар көрсөтүлүүдө. Бул туурасында Тышкы иштер министрлигинин басма сөз кызматынан кабарлашты.

Белгилүү болгондой, 2-июнда элчиликтин Иркутск шаарындагы кеңсесине Бурятиянын Мухоршибирский районунун Нижний Шатай айылында Кыргыз жарандарын мыйзамсыз кармоо фактысы жөнүндө маалымат келип түшкөн.

"2021-жылдын кыш мезгилинде 6 Кыргыз жараны келишимдик негизде Бурятияга келишкен. Аларга жумуш таап берген ортомчу Кыргыз жараны болгон. Эмгек акы төлөөнүн шарттары жана иштөө шарттары жөнүндө макулдашууга карабастан иш берүүчү мекендештерибиздин укугун бузуп, алардын паспортторун да тартып алган.

14-июнда Кыргыз өлкөсүнүн элчилигинин Иркутск шаарындагы кеңсеси Орусиянын Миграция маселелери боюнча башкармалыгынын көмөгү менен алынган паспортторду ээлерине кайтарып берген. Эртеси алты жарандын үчөө жумуш ордун таштап кетишкен.

18-июнда калган 3 мекендешибиз жеке чарбанын аймагынан чыгарылды. Учурда алар Улан-Удэ шаарындагы мейманканага жайгаштырылып, диаспоралар тарабынан бардык жардамдар көрсөтүлүүдө. Бул факт боюнча Бурятиянын укук коргоо органдары тергөө иштерин жүргүзүп жатышат", - деп айтылат маалыматта.