Мэрия: "Бишкекте бак-дарактарга чачылып жаткан аралашманын адамдарга эч кандай зыяны жок"

Буга чейин айрым массалык маалымат булактарында Бишкекте дарактарга белгисиз суюктук чачылып жаткандыгы айтылып, мындан шаар туургундары чочулап жаткандыгы боюнча маалымат тараган.

Аталган окуя боюнча Бишкек шаардык мэриясы расмий маалымат таратып, бак-дарактарды дарылап жаткан суюктук адамдарга эч кандай зыян алып келбей турганын билдирди.

"Тарап жаткан видеодогу унаа "Бишкек жашыл чарба" ишканасынын атайын кызматтык унаасы. Ал эми чачылып жаткан суюктук аралашма (10 литр сууга 10 грамм өлчөмүндөгү химиялык каражат) гана кошулуп жасалат. Аралашма бак-дарактарды курт-кумурска сыяктуу зыянкечтерден коргоо үчүн колдонулууда. Белгилей кетсек, бул каражат адамдын организмине эч кандай терс таасир этпейт. Дарылоо иштери түнкүсүн жүрүп жаткандыгынын себеби - бул убакта дарактардын жалбырактары күйүп калуу ыктымалдуулугу аз болот.

Бишкек шаарынын тургундары, сиздерден суранабыз, дүрбөлөңгө алдырбаңыздар. Маалыматтарды расмий булактардан тактап, текшерип алууңуздарды өтүнөбүз", - деп айтылат Бишкек шаардык мэриясынын маалыматында.