Түркмөнстан Ысык-Көлгө беш жылдыздуу мейманкана курууну пландоодо

Президент Садыр Жапаров 27-28-июнда Гурбангулы Бердымухамедовдун чакыруусу менен Түркмөнстанда болду. Анда эки өлкөнүн лидерлери бир катар документтерге кол коюшту.

Макулдашууда Түркмөнстан Кыргыз өлкөсүнүн аймагында мейманкана курары дагы белгиленгенин экономика жана каржы министри Акылбек Жапаров өлкө башчынын Түркмөнстанга болгон расмий сапарынын жыйынтыгы тууралуу айтып жатып билдирди.

"Коңшу тарап Түркмөнстандын соода үйү үчүн имарат курууга даяр. Бул биздин өндүрүшчүлөр менен өнөр жайчыларга жакшы таасирин тийгизет деп ойлойм.

Ошондой эле Ысык-Көлдө ден соолукту чыңдоочу комплекси менен беш жылдыздуу мейманкана куруу пландалууда. Биздин делегацияны август айынын биринчи он күндүгүндө Түркмөнстанда ушул багыттагы долбоорлор кандай ишке ашып жаткандыгын көрүү үчүн чакырышты. Эгерде биздин делегация зарыл деп эсептесе, анда быйыл жыл бою иштей турган санаторийдин курулушу башталат", - деп билдирди Акылбек Жапаров.