"Коопсуз шаар" долбоорунун фото-фиксациясы бузууларды мыйзамсыз жазганбы? Башкармалыктын жообу

Буга чейин социалдык тармактарда белгисиз жарандын видео кайрылуусу тарап, анда ал жол эрежесин бузууларын сүрөт-жаздыруу мыйзамсыз жөнгө салынып жатканын айткан. Ошондой эле кайрылуу жасаган жаран ылдамдыкты чектөө эрежелерин бузууну каттаган фото-фиксация мыйзамсыз жазган деп айыптаган. Буга байланыштуу Жол кыймылынын коопсуздугун камсыздоо башкы башкармалыгы маалымдама жасады.

"Стандартташтыруу жана метрология борбору тарабынан ылдамдыктын бузулушун өлчөө каражаттарын мезгил-мезгили менен текшерүү жүргүзүлүп турат. Берилген текшерүү күбөлүгүнө ылайык, ылдамдыкты бузгандыгы үчүн бардык фото каттоо тутумдарынын иштөө мөөнөтү 2022-жылдын 23-августуна чейин жарактуу жана мыйзамдуу түрдө иштейт.

"Коопсуз шаар" долбоору бул мамлекеттик долбоор, негизги максаты жол кыймылынын коопсуздугун камсыз кылууда жарандардын коопсуздугун, жолдогу тартипти, маданияттуулукту жана жол-транспорт кырсыктарын алдын алуу, адам өмүрүн алган учурларын жокко чыгаруунун таасирдүү инструменти болуп эсептелет.

Аталган долбоор жол кыймылынын катышуучуларынын жоопкерчилигин жогорулатууга, коомдук тартипти сактоого, мыйзамдардын так аткарылышына өбөлгө түзөт жана жарандардын мамлекеттик бийлик органдарына болгон ишениминин деңгээлин жогорулатууга багытталган. Коррупциянын курамдык бөлүгү жок.

Мыйзам бузууларды жасагандыгы үчүн алынган айып пулдар автоматтык түрдө "Коопсуз шаар" автоматташтырылган маалымат тутумун колдонуу менен жүргүзүлөт, мыйзамдарга ылайык, айыптардан түшкөн каражат мамлекеттик бюджетке түшөт.

Жол кыймылынын коопсуздугун камсыздоо башкы башкармалыгы автоматташтырылган "Коопсуз шаар" маалымат тутумунун колдонуучусу болуп саналат, негизги функциялары: транспорт каражаттарынын ээлерин жоопко тартуу жөнүндө бузуу токтомун иштеп чыгуу жана чыгаруу, басып чыгаруу, конвертациялоо жана даректерине жеткирүү", - дешти мекемеден.