Жумушуна мас болуп келген судья кызматынан бошотулду

Чүй облустук сотунун судьясы Дамирбек Оңолбеков ээлеген кызматынан бошотулду. Бул тууралуу президенттик аппараттын басма сөз кызматынан кабарлады.

"Судьянын жүрүм-турумунун кынтыксыздыгынын талаптарын бузгандыгына байланыштуу Дамирбек Оңолбеков Кыргыз Республикасынын жергиликтүү сотунун судьясынын кызмат ордунан бошотулуп, Чүй облустук сотунун судьясы ыйгарым укуктары мөөнөтүнөн мурда токтотулду", - деп жазылат билдирүүдө.

Тийиштүү буйрукка өлкө башчы Садыр Жапаров кол койгон.

Белгилей кетсек, 7-июнда сот жана укук коргоо ишин өркүндөтүү маселелери боюнча кеңештин биринчи жыйынында президент Садыр Жапаров облустук соттун төрагасы жумушуна мас болуп келген видеону көрсөткөн.

Мамлекет башчы Жогорку Соттун төрайымы Нургүл Бакировага кайрылып, бул судьяга тез арада чара көрүүнү сунуштаган. Ал эми төрайым бул иш боюнча чара көрүлөрүн билдирген.