Жогорку Кеңештин кезексиз жыйыны ачылды

Бүгүн, 5-июлда Жогорку Кеңештин кезексиз жыйыны ачылды.

Эл өкүлдөрү Кыргыз мамлекетиндеги пандемияга байланыштуу оор кырдаалды эске алып, эмгек өргүүгө чыкпастан колдонуудагы мыйзамдарды Конституцияга шайкеш келтирүү максатында жаңы мыйзамдарды кабыл алуу зарыл экенин белгилеп, кезексиз сессия чакыртууну сунушташкан. Депутаттар 5-июлдан 30-июлга чейин Жогорку Кеңештин кезексиз сессиясын чакыртуу чечимин кабыл алышкан.

30-июнда Жогорку Кеңештин кезектеги сессиясынын жабылуу аземи өткөн. Бул сессияда 131 мыйзам долбоору, 615 токтом кабыл алынып, премьер-министрдин, Башкы прокурордун, Улуттук банктын жана Эсептөө палатасынын жетекчилеринин жылдык отчёттору угулган.