Салык кызматы 5 май куюучу жайга айып пул салды

Мамлекеттик салык кызматы көзөмөлдөө иш-чараларынын натыйжасында беш май куюучу жайга мунай заттарын сатуу тартибин бузгандыгы үчүн айып пул салган. Бул тууралуу аталган мекеменин басма сөз кызматынан билдиришти.

Текшерүүнүн жүрүшүндө бир катар май куюучу жайлар салык кызматына онлайн режиминде сатылып жаткан товарлардын кодун тапшырбагандыгы аныкталган. Аларга 175 миң сом айып пул салынган.

2020-жылдын 1-июлунан тартып SMART Salym салык жол-жоболорун фискалдаштыруу долбоорунун алкагында, май куюучу жайлар автоматташтырылган башкаруу тутумун жана кассалык квитанцияда сатылган күйүүчү май жөнүндө маалыматтарды басып чыгаруу функциясы бар кассаны колдонушу керек жана маалыматтарды онлайн түрүндө салык кызматына жөнөтүүсү шарт.

Май куюучу жайларда мунай заттарын сатуу тартибин бузгандыгы үчүн жеке ишкерге 12 миң 500 сом, ал эми юридикалык жакка 35 миң сом айып салынат.