Бишкек АШК көп аялдуулукту мыйзамдаштырабыз деген талапкер боюнча укук коргоо органдарына кайрылууну сунуштады

Бишкектин аймактык шайлоо комиссиясы "Реформа" саясий партиясынын "Келечек-Будущее" саясий партиясына карата арызын эмне себептен кабыл албагандыгын түшүндүрүп берди.

Маалыматка ылайык, "Реформа" саясий партиясы өз билдирүүсүндө Конституцияга, Кылмыш-жаза кодексине жана "Жергиликтүү кеңештердин депутаттарын шайлоо жөнүндө" мыйзамга таянган.

"Көп аялдуулук боюнча социалдык тармакта жарыяланган “Келечек-Будущее” партиясынын мүчөсүнүн кайрылуусун кароонун натыйжалары боюнча “Жергиликтүү кеңештердин депутаттарын шайлоо жөнүндө” мыйзамдын талаптары бузулган деп табылган жок, ошондой эле арыз ээсине кылмыш белгилерин аныктоо үчүн укук коргоо органдарына кайрылуу жөнүндө сунуш берилди", - деп айтылат маалыматта.

Буга чейин "Көп аялдуулукту мыйзамдаштырабыз" деген талапкердин кайрылуусу Борбордук шайлоо комиссиясы тарабынан шайлоонун мыйзамдарын бузган жок деп табылган.