Түрк ЖМКлары: "Орхан Инанды террордук уюмдун мүчөлөрүнө Кыргыз өлкөсүнүн паспортторун мыйзамсыз алып берген"

Түркиялык жалпыга маалымдоо каражаттары Орхан Инанды "Куралдуу террордук уюмду негиздегени жана жетектегени" үчүн камакка алынгандыгын жазып чыгышты. Маалыматта Инанды 2001-жылдан бери Фетуллахчы террордук уюмунун (ФЕТО) Кыргыз өлкөсүндөгү жооптуу кишиси экендиги айтылат.

"Орхан Инанды уюмдун лидери Фетхуллах Гүлендин көрсөтмөсү менен Кыргыз өлкөсү, Азербайжан, Казакстан, Түркмөнстан, Тажикстан жана Өзбекстанда уюмдун иштерин жүргүзгөн. Ал Кыргыз өлкөсүндө жүргөндө АКШда жашаган ФЕТОнун лидерине тез-тез барып турган. Инанды АКШдан ФЕТОго таандык ByLock телефон тиркемеси аркылуу тапшырма алчу. Ал Түркиядан Кыргыз өлкөсүнө качкан уюмдун мүчөлөрүнө башпаанек сураган. Андан сырткары уюмдун жогорку даражалуу 25 мүчөсүнө Кыргыз өлкөсүнүн паспортун мыйзамсыз алып бергени аныкталды. Кыргыз өлкөсүнүн паспортун алгандардын арасында Түркияда "террордук уюм түзүү" беренеси менен издөөдө жүргөн Мустафа Өзжан менен Али Челик да бар", - деп жазышкан маалымат каражаттары Түркиянын коопсуздук кызматтарына шилтеме берүү менен.

Белгилей кетсек, Орхан Инанды Кыргыз жараны жана көп жылдан бери Кыргыз өлкөсүндө иштеп, жашап келген. Ал ушул жылдын 1-июнунан бери дайынсыз болуп жаткан. 5-июлда Түркиянын президенти Режеп Тайип Эрдоган Орхан Инанды атайын операциянын негизинде колго түшүрүлүп, Түркияга жеткирилгенин кабарлаган.