Электр энергиясына жаңы тариф сентябрда ишке кирет. Баалар кандай болот?

- Электр энергиянын тарифтик саясат долбоору коомдук талкуу үчүн өкмөттүн сайтына илинген болчу. Сунушталган негизги өзгөрүүлөр биринчиден жалпы элге тарифтер 77 тыйындан 1 сом 0,9 тыйынга чейин көтөрүлүп жатат. Ошол эле 700 киловаттык чектөө алынууда. Кыш мезгилинде ноябрь айынан март айына чейин 1000 киловаттан ашса 2 сом 52 тыйын болору сунушталууда. Бирок алыскы тоолуу аймактарда жашаган абоненттерге жалпы жагылган көлөмүнө 1 сом 0,9 тыйын бойдон калтыруу сунушталып жатат.

Сууну чыгара турган насостук станциялар үчүн 1 сом 0,9 тыйындан тариф сунушталды. Троллейбус жана башка электр энергиясы менен жүргөн транспортторго 1 сом 58 тыйындан 1 сом 68 тыйынга чейин көтөрүү инфляцияга байланыштуу болуп жатат. Инфляция 2020-жылы 6,3 пайызды түзгөн. Интернат, карылар үйү, мечит, чиркөөлөргө тариф 2 сом 24 тыйындан 1 сом 68 тыйынга түштү. Базарлар, дүкөндөр жана башка соода тармагындагы абоненттер жана бюджеттик мекемелер үчүн 2 сом 52 тыйын кылуу сунушталып жатат. Алтын казуучу ишканалар, цемент заводдору, алкоголь өнөр жайы үчүн 2 сом 52 тыйындын ордуна 5 сом 4 тыйын кылуу сунушталды.

Жаңы тарифтер ишке кирсе эл кыйналбайт. Мисалы, 1 миң киловатт саат жаккандан кийин эсеп 1 миң 95 сомго келет. Ал эми 1 миң киловатт саатты азыркы тарифтер менен санаганда 1 миң 190 сом болуп кетип жатат. Тескерисинче, эсеп азаюуда. Анткени учурда 700 киловаттка чейинки чектөө бар. Андан ашса тариф 2 сом 16 тыйын алынат. Жаңы сунушта болсо кышкы мезгилге 1000 киловатт берилип жатат.