Чек ара кызматы Орхан Инанды дайынсыз болгондон бери бардык учактар текшерилгенин билдирди

Бүгүн, 7-июлда парламент жыйынында Кыргыз жараны, "Сапат" эл аралык билим берүү мекемесинин негиздөөчүсү Орхан Инандынын жоголуу фактысы боюнча мамлекеттик органдардын маалыматы жөнүндөгү Жогорку Кеңештин токтомунун аткарылышы талкууга алынды.

Анда мамлекеттик чек ара кызматынын төрагасы Уларбек Шаршеев 1-июндан тарта чек аралар катуу көзөмөлдөнүп, өткөрмө жайлары дыкат текшериле баштаганын билдирди. Айтымында, Бишкектен учкан учактардын баары текшерилген.

Белгилей кетсек, Орхан Инанды Кыргыз жараны жана көп жылдан бери Кыргыз өлкөсүндө иштеп, жашап келген. Ал ушул жылдын 1-июнунан бери дайынсыз болуп жаткан. 5-июлда Түркиянын президенти Режеп Тайип Эрдоган Орхан Инанды атайын операциянын негизинде колго түшүрүлүп, Түркияга жеткирилгенин кабарлаган.

Кечээ, 6-июлда президенттин тапшырмасы менен Тышкы иштер министрлиги Түркиянын Кыргыз өлкөсүндөгү ыйгарым укуктуу элчиси Ахмет Доганга Орхан Инандыны кайтарып берүү боюнча нота тапшырган.