“Шайыр апалар” долбоорунун төрайымы Айымкан Кенжеева дүйнө салды

Айымкан Кенжеева (Жаманкулова) 1938-жылдын 7-ноябрында Жалал-Абад облусунун Ала-Бука районунда Жапасалды айылында туулган. 1954-жылы орто мектепти бүтүп Жалал-Абад шаарындагы Пушкин атындагы педагогикалык окуу жайына кирип 1958-жылы толук курсун аяктап, мугалим болуп иштей баштаган. 1960-жылы Ош пединститутунун тарых факультетин аяктаган. Эмгек жолун мугалим болуудан баштап, завуч, директор, техникалык окуу жайдын директору, Ала-Бука райком партиясынын инструктору кызматтарын аркалаган.

1968-жылдан бери Сокулук районунда жашап, мугалим, мектептин директору, райондук билим берүү бөлүмүнүн инспектору, 2005-жылдан баштап маданият бөлүмүнүн кызматкери болуп иштеген. Усулчу, башкы адис, хормейстер болуп, Сокулук райондук маданият бөлүмүнүн башчысы болуп иштеген. 1994-жылы фольклордук топ түзүп, 2011-жылдан баштап бүгүнкү күнгө чейин Сокулук райондук маданият бөлүмүндөгү “Аксаамай” элдик фольклордук аспаптар ансамблинин көркөм жетекчиси болуп эмгектенип келген. Бир нече долбоорлордун түзүүчүсү катары коомчулукта кадыр-барк алган. Мисалы, Сокулук районундагы “Адеп башаты - ападан”, “Талант тамыры - элде”, “Шайыр апалар” долбоорунун төрайымы жана башкалар.

Айымкан Кенжеева бир нече жолку республикалык, облустук фестивалдардын, кароо-сынактардын уюштуруучусу жана катышуучусу, кыргыз маданиятынын өнүгүшүнө зор салымын кошкон.

Ошондой эле ал “Сырын каткан алтын така”, “Рахманкул хан”, “Жер энеси-Зууракан” аттуу китептердин автору.

“Эл агартуунун мыктысы”, “Маданияттын мыкты кызматкери”, “Кыргыз Республикасынын маданиятына эмгек сиңирген ишмер” сыйлыктарына татыктуу болгон.

SUPER.KG порталынын эмгек жамааты Айымкан Кенжееванын дүйнөдөн кайтканына байланыштуу үй-бүлөсүнүн, жакындарынын аза кайгысын тең бөлүшүп, терең кайгыруу менен көңүл айтат.