Атайын комитет Ысык-Көл районунун мектептери менен таанышып, кемчиликтерин белгилешти

Кыргыз Республикасынын Жогорку Кеңешинин Билим берүү, илим, маданият жана спорт боюнча комитети Ысык-Көл облусунда кезектеги көчмө жыйынын өткөрүүдө. Бул тууралуу 28-октябрда Жогорку Кеңештин басма сөз кызматынан билдиришти. Тийиштүү комитет “Ысык-Көл облусундагы билим берүү, маданият, архив, спорт жана диний мекемелеринин иштери жана алардын өнүгүү келечеги жөнүндө” аттуу көчмө жыйындын алкагында Ысык-Көл районунун билим берүү мекемелеринин абалы менен таанышты. Көчмө жыйындын программасына ылайык, Ысык-Көл районундагы Чырпыкты айылында комитет мүчөлөрү Касым Тыныстанов атындагы мектептин 1961-жылы салынган имаратын көрүп чыгышты. Мектеп жетекчилигинин айтымында, мектептин жаңы имаратынын пайдубалы 1998-жылы түптөлүп, каражат жоктугуна байланыштуу ошол бойдон токтоп калган. Ал эми эски мектептин жыл сайын жасалчу оңдоп-түзөө иштерине бир топ каражат кетет. Жыйындын катышуучулары эскини жыл сайын жамай бербей, жаңы имаратка каржы бөлүү максатка ылайыктуу экенин белгилеп өтүштү.