Андан бери 29 саат өттү. Тажик тарап алып кирип кеткен аскер кызматкери өлкөгө кайтарыла элек

Кечээ, 8-июлда Кыргыз-Тажик чек арачыларынын ортосундагы ок атышуудан 27 жаштагы Кыргыз жараны каза болгон. Ал эми дагы бир аскер кызматкерин тажик чек арачылары кармап, Тажикстандын аймагына киргизип кетишкен.

Бүгүн, 9-июль саат 22:30га карата каза болгон дагы, кармап кетишкен дагы кызматкерлерди тажик тарап Кыргыз өлкөсүнө киргизип бере элек. Андан бери 29 жарым саат өттү. Буга чейин УКМКнын Чек ара кызматы: "Каза болгон УКМКнын Чек ара кызматынын аскер кызматкери сержант Хуснидин Хожиевдин сөөгү өлкөгө бүгүн Тажикстандын аймагы аркылуу алып келинет. Алар дагы бир аскер кызматкерин кармашкан жана аны кайтарып алуу боюнча эки өлкөнүн чек ара өкүлдөрүнүн жолугушуусунда каралып жатат", - деп билдиришкен эле.

8-июль күнү саат 17:00 чамасында Кыргыз-Тажик чек арасында эки тараптын чек арачыларынын арасында ок атышуу болгон. Анда Улуттук коопсуздук боюнча мамлекеттик комитетинин Чек ара кызматынын атчандардын чек ара отряды Чашмагил ашуусунан күтүүсүздөн Тажикстандын чек арачылары тарабынан кол салуусуна дуушар болгон.