"Тойго, сахнага кийүүчү кийим болуптур". Токиодогу жайкы Олимпиада үчүн кыргыз курама командасынын параддык формасы талкууда

Социалдык тармактарда Токиодогу жайкы Олимпиада оюндарында Кыргыз өлкөсүнүн курама командасынын параддык формасы талкууга алынды.

"Чынын айтсам, анча эмес. Алыстан караганда форма кыргыздын колоритин так чагылдырбайт. Сакура гүлдөрүн жана тоостун канаттарын чаптап коюшкан. Муфтийдин формасына окшош экен".

"Бардык жакка эле чапан менен калпакты чаптай беришет, ысыкта болбой калат го".

"Тойго, сахнага кийүүчү кийим болуптур. Өзүбүздүн спорт кийимдери кайда?".

"Мага жаккан жок. Спортчу эмес, артист болуп калышыптыр" деп жазып калтырышкан социалдык тармактын колдонуучулары.

Бүгүн, 13-июлда министрлер кабинетинин төрагасы Улукбек Марипов улуттук кураманын капитаны Атабек Азисбековго Кыргыз өлкөсүнүн желегин тапшырды. Салтка ылайык, аны президент Садыр Жапаров тапшырышы керек эле. Бирок Жапаров аралыктан иштеп жаткандыгына байланыштуу желек тапшыра алган эмес.

Ал эми буга чейинки Олимпиада оюндарында да кыргыз спортчулары чапан кийип келишкен.

Коңшу Казакстандын быйылкы жайкы Олимпиада оюндарында курама командасынын параддык формасы социалдык тармактарда алкоого алынган.

Белгилей кетсек, жайкы Олимпиада оюндары 23-июлдан 8-августка чейин Японияда өтөт.