Элчилик: "Москвадагы чыр-чатактын келип чыгышы жөнүндө маалыматтар чындыкка дал келбейт"

Москвадагы улуттар аралык негиздеги чыр-чатактын келип чыгуусу жөнүндө маалыматтар чындыкка дал келбейт. Бул тууралуу Орусиядагы Кыргыз өлкөсүнүн элчилигинин басма сөз кызматынан билдиришти.

Маалыматка ылайык, учурда Орусия Федерациясынын тиешелүү компетенттүү органдары тарабынан күнөөлүүлөрдү аныктоо боюнча тергөө иш-чаралары жүргүзүлүүдө.

"Элчилик Кыргыз жарандарына туруктуу негизде юридикалык жана консулдук жардам көрсөтүп жатат. Эске сала кетүүчү жагдай, социалдык тармактарда таратылып жаткан улуттар аралык негиздеги чыр-чатактын келип чыгуусу жөнүндө маалыматтар чындыкка дал келбейт. Андыктан элчилик Кыргыз жарандарын чагымчылдыкка алдырбоого, сабырдуу болууга жана Орусиянын мыйзамдарын бузбоого чакырат", - деп айтылат маалыматта.

Элчилик тараткан билдирүүсүндө кеп кайсы маалымат тууралуу болуп жатканын белгилеген эмес.

Буга чейин Москва шаарындагы "Кузьминки" метро станциясынын жанында жүздөгөн мигрант массалык мушташ уюштурушканы белгилүү болгон.