Франция "Google" компаниясына 500 миллион евро өлчөмүндө айып пул салды

Франциянын Монополияга каршы жөнгө салуу кызматы "Google" компаниясына 500 миллион евро өлчөмүндө айып пул салды. Бул тууралуу дүйнөлүк басылмаларда жазылды.

Басылмалардын маалыматына ылайык, Монополияга каршы жөнгө салуучу кызмат компаниядан корголгон контентти колдонгону үчүн басмаканаларга сыйлык берүү боюнча сунуштарды киргизүүнү талап кылды. Эгер "Google" муну эки айдын ичинде жасабаса, ар бир кечиккен күн үчүн 900 миң евро төлөп бериши керек.

Белгилүү болгондой, 2019-жылы басмаканалардын бир нече кесиптик бирикмелери жана "Франс Пресс" агенттиги "Google" компаниясын чектеш укуктар жөнүндөгү мыйзамга ылайык, үстөмдүк абалынан кыянаттык менен пайдаланып жаткандыгына нааразычылыгын билдирген. 2020-жылдын апрелинде монополияга каршы орган IT гигантына басмаканалар менен компенсация боюнча сүйлөшүүлөрдү жүргүзүүнү буйрук кылды.