Энергетика министри: "Электр энергиясына болгон бааны көтөрбөйбүз"

Электр энергиясына болгон баа көтөрүлбөйт. Бул тууралуу энергетика жана өнөр жай министри Доскул Бекмурзаев "Азаттыкка" берген маегинде айтты.

Айтымында, мындай чечим кечээ, 13-июлда президент Садыр Жапаров менен жолугушуп электр энергиясынын тарифтерин талкуулагандан кийин кабыл алынган.

"Президент келерки жылы айлыкты, пенсия, жөлөк пулду жогорулатмайынча калкка электр энергиясынын тарифин көтөрбөйбүз деп айтты. Ошондуктан жаңы жылдан кийин айлык, пенсия, жөлөк пул көтөрүлгөн соң апрель айынан тарта жаңы тарифти киргизгенге аракет кылабыз", - деп билдирди министр.

Ошондой эле электр энергиясынын бир кВт/сааты азыркыдай эле 77 тыйындан сатылат. Андан тышкары тоолуу райондордо электр жарыгына киргизилген 700 кВт/саат чектөө жоюлат. Ал эми калган аймактагы тургундар бир айда 700 кВт / сааттан ашык электр энергиясын колдонсо 2 сом 16 тыйындан төлөнөрүн билдирди.

Буга чейин өлкөдө электр энергиясына жаңы тарифтерди ушул жылдын 1-сентябрынан тарта киргизүү пландалып жатканы кабарланган.