Токтогул ГЭСин модернизациялоого керектүү жабдыктарды эртерээк алып келүү үчүн Кыргыз өлкөсү Кытайдан жардам сурады

Бүгүн, 14-июлда тышкы иштер министринин орун басары Айбек Артыкбаев Кытайдын Кыргыз өлкөсүндөгү атайын жана ыйгарым укуктуу элчиси Ду Дэвэнь менен жолугушту. Бул тууралуу Тышкы иштер министрлиги кабарлады.

"Жолугушуунун жүрүшүндө тараптар Кыргыз өлкөсү менен Кытай Эл Республикасынын ортосундагы ынак коңшу жана достук мамилелеринин ырааттуу өнүгүшүнө, эки өлкөнүн өз ара пайдалуу кызматташтыгынын жогорку динамикасына канааттануусун билдиришти. Ошол эле учурда алар кыргыз-кытай кызматташтыгынын актуалдуу маселелерин талкуулашты.

Кыргыз өлкөсү менен Кытай мамлекетинин ортосунда жүк ташуунун көлөмүн көбөйтүү маселелерине өзгөчө көңүл бурулду. Атап айтканда, Артыкбаев “Иркештам” өткөрүү пункту аркылуу Токтогул ГЭСин модернизациялоого керектүү жабдууларды Кытайдан Кыргыз өлкөсүнө тез арада өткөрүүгө көмөктөшүү өтүнүчүн билдирди", - деп жазылат билдирүүдө.

Элчи Ду Дэвэнь Кытай тарап ар дайым жардам көрсөтүп келе жаткандыгын белгилеп, бул маселени чечүүдө максималдуу жардам көрсөтүлөрүн баса белгилеген.