Орусияга Кыргыз өлкөсү жана Казакстандан барган 390 тоннадан ашык азык-түлүк продукциясы киргизилбей калды

Орусиянын Алтай аймагынын Кулунда жана Рубцовский райондоруна 5-13-июль аралыгында 280 тонна дарбыз, 40 тонна пияз, 40 тонна жемиш жана 30 тонна башка фитосанитардык тобокелдик менен жөнгө салынган азыктар алып кирүүгө уруксат берилген жок. Бул тууралуу маалымат Россельхознадзордун расмий баракчасына жарыяланды.

"Россельхознадзордун (Ветеринардык жана фитосанитардык көзөмөл боюнча федералдык кызматы) Алтай аймагы жана Алтай Республикасы боюнча башкармалыгынын инспекторлору продукцияны ташып жеткирүү документтерине туура келбеген маалыматтарды камтыган жараксыз фитосанитардык сертификаттар, ошондой эле продукцияны жүктөөчү жана түшүрүүчү жерлери жөнүндө так эмес маалыматтарды алып жүрүшкөнүн аныкташкан", - деп жазылат маалыматта.

Орусиянын Федералдык коопсуздук кызматы Алтай аймагы боюнча башкармалыгы тарабынан Казакстан жана Кыргыз өлкөсүнөн 390 тоннадан ашык продукцияны ташып келүүдө фитосанитардык мыйзамдарды бузган 21 учур аныктаган.