Президенттин тапшырмасы менен Улукбек Марипов Баткенге кетти

Президенттин тапшырмасы менен министрлер кабинетинин төрагасы Улукбек Марипов Баткен облусуна жумушчу сапары менен барды. Бул тууралуу министрлер кабинетинин басма сөз кызматынан билдиришти.

Эки күндүк сапар алкагында министрлер кабинетинин башчысы Жалал-Абад облусуна да барат.

Сапардын жүрүшүндө Улукбек Марипов селдин кесепеттерин жоюуга байланыштуу иштердин жүрүшү жана бир катар инфраструктура объектилеринин абалы менен таанышып, табигат кырсыгынан жабыркаган райондордун тургундары менен жолугушат.

Буга чейин тийиштүү мамлекеттик органдарга тийиштүү авариялык-калыбына келтирүү иштерин кыска мөөнөттө жана толук көлөмдө жүргүзүүсү тапшырылган. Мындан тышкары, сел кырсыгынын кесепетинен курман болгондордун үй-бүлөлөрүнө материалдык көмөк көрсөтүлмөкчү.