Айтматовдун уулу көрүстөндөгү түндүк жерге ыргытылгандыгын айтып чыкты

Улуу жазуучу Чыңгыз Айтматовдун Ата-Бейиттеги көрүстөнүндөгү түндүктү белгисиз адамдар алып салышкандыгы тууралуу билдирүүлөр тараган.

Бул боюнча Маданият, маалымат, спорт жана жаштар саясаты министрлиги "Улуттун улуу символикасын бийик көтөрүү максатында, “Түндүгүң түшкүр” деген наалаттан алыс болуу ниетинде түндүк алып салынган" деп жооп берген.

Ал эми Айтматовдун уулу Аскар Айтматов түндүк Ата-Бейит комплексинин жанына ыргытылгандыгын айтып, мемориалдык комплекстин архитектуралык долбоорунун автору Улан Бейшеналиевге социалдык тармактан кайрылган. Бул боюнча коомдук ишмер Ассоль Молдокматова баракчасына жазды.

"Түндүктү көтөрүү талабы менен көптөгөн кайрылуулар болду деп жатасыз. Комплекс ачылгандан бери өткөн сегиз жылдын ичинде коом тарабынан мындай талаптарды уга элекмин.

Түндүк жерде жаткан эмес, бийиктиги жарым метрден кем эмес мраморго орнотулган. Чыңгыз Айтматовдун мүрзөсү түбөлүктүү үй, ал эми түндүк бул үйдүн чатыры. Эң негизгиси, Айтматовдун мүрзөсүндөгү түндүктүн айынан элибизде көйгөйлөр жаралышы мүмкүн экендигинен шек санайм.

Сиздин сөзүңүз боюнча түндүк ыргытылган эмес. Мына сиз ансыз деле ачык эле калп айтып жатасыз. Мүрзөдөн алынган түндүк комплекстин жанындагы жерге ыргытылган", - деп билдирген Аскар Айтматов.