Статком: "Өлкөдө пневмония оорусуна чалдыккандар өткөн жылдын ушул айына салыштырмалуу 24 пайызга көбөйдү"

Республикада пневмония оорусуна чалдыгуулар өткөн жылдын январь-июнуна салыштырмалуу 24 пайызга көбөйдү. Бул тууралуу Улуттук статистика комитетинин расмий сайтына жарыяланды.

Саламаттыкты сактоо жана социалдык өнүгүү министрлигинин ыкчам маалыматтары боюнча, ушул жылдын январь-июнунда жалпы республика боюнча пневмония оорусуна чалдыгуулардын 16 миңден ашык учуру катталды. Бул өткөн жылдын тиешелүү мезгилине салыштырмалуу 24,3 пайызга көп.

Январь-июнда пневмония оорусуна чалдыгуулардын саны

	Бардык учурлар		Пайыз менен
	2020	2021	Өткөн жылдын тиешелүү мезгили	жыйынтыгы

Кыргыз өлкөсү	13 026	16 190	124,3	100
Баткен облусу	1 811	1 353	74,7	8,4
Жалал-Абад облусу	2 659	2 852	107,3	17,6
Ысык-Көл облусу	1 326	2 137	161,2	13,2
Нарын облусу	706	1 203	170,4	7,4
Ош облусу	2 193	2 451	111,8	15,1
Талас облусу	781	624	79,9	3,9
Чүй облусу	2 020	3 285	162,6	20,3
Бишкек шаары	1 188	1 875	157,8	11,6
Ош шаары	342	410	119,9	2,5

Өткөн жылдын январь-июнуна салыштырмалуу пневмония оорусуна чалдыгуулардын Нарын облусунда - 1,7 эсеге, Чүй, Ысык-Көл облустарында жана Бишкек шаарында - 1,6 эсеге олуттуу көбөйгөнү белгиленди. Ошол эле учурда оорулардын саны Баткен облусунда - 25,3 пайызга жана Талас облусунда - 20,1 пайызга төмөндөдү.

Пневмония оорусуна чалдыгуулардын жалпы санындагы эң чоң үлүш Чүй облусуна - 20,3 пайыз, Жалал-Абад облусуна - 17,6 пайызы жана Ош облусуна - 15,1 пайызы туура келди.