Баткен: Чек арада кайрадан ок атылды

Бүгүн, 24-июлда тажик жарандары Баткендеги Кум-Мазар участкасында такталбаган аймакта тазалоо иштерин,ишембилик жүргүзүп жаткандыгына байланыштуу пикир келишпестик жаралып, ок атуу орун алды. Бул тууралуу Баткен облустук администрациясынан кабарлашты.

"Баткен облусунун башчысы Абдикарим Алимбаев абалды жөнгө салуу жана чагымчылдыкка жол бербөө боюнча Тажикстандын Согди облусунун аткаруу бийлигинин төрагасы Ражаббой Ахмадзода менен телефон аркылуу сүйлөштү.

Жеринде ыйгарым укуктуу өкүлүнүн тапшырмасы менен өкүлдүн биринчи орун басары Маруфхан Тулаев баштаган Баткен районунун акими жана облустук тиешелүү күч органдарынын жетекчилери жергиликтүү эл арасында түшүндүрүү иштерин жүргүзүү жана чыр-чатактардын алдын алуу жана болтурбоо боюнча иш алып барууда", - деп жазылат билдирүүдө.

Облустук администрациянын билдиришинче, Тажик жарандары Кум-Мазар участкасында такталбаган аймакта тазалоо иштерин,ишембилик жүргүзүшкөн. Кыргыз жарандары тарабынан такталбаган аймакта тазалоо иштерин жүргүзүүгө каршы пикир айтылып, Тажик жарандарынын арасынан таш ыргытуу болгон. Андан соң эки тараптын чек арачыларынын ортосунда ок атышуу орун алган. Учурда абал туруктуу, жеринде эки тараптын чек ара кызматтары, Баткен районунун акими жана тиешелүү күч түзүмдөрүнүн жетекчилери ортосунда сүйлөшүү жүрүүдө. Жараат алгандар жок.

Учурда эки тараптуу ок атышуу токтогон. Абал туруктуу, эки тараптын чек ара кызматтары, тиешелүү күч кызматкерлери жана Баткен районунун акими чек аралаш аймакта абалды жөнгө салуу жана болтурбоо боюнча жеринде сүйлөшүү жүргүзүүдө.