Садыр Жапаровдун көзүнө операция жасалды

Өткөн аптада президент Садыр Жапаров коронавируска каршы эмдөөдөн өтүп, ага көз айнекчен келген болчу. Ал ирет коомчулуктун көңүлү көз айнекке бурулганы менен анчейин суроолор жаралган эмес. Көп өтпөй УКМКнын төрагасы Камчыбек Ташиев менен түшкөн сүрөттөрү интернет айдыңына тарап, анда да өлкө башчысы көз айнегин чечкен эмес. Кийин "Кыргызалтын Ювелирпром" жаңы ишканасына барып, имараттын ичинде зер буюмдардын деталдарын да күндөн коргоочу көз айнек менен карап жүргөн.

Буга байланыштуу интернет колдонуучулары "Садыр Жапаровдун көзүнө эмне болгон?", "Эмне үчүн көз айнекти такыр чечпей калды?" деген суроолорду өз ара жаадырып жатышты.

Мамлекет башчысынын имарат ичинде күндөн коргоочу көз айнек тагынуусу тууралуу президенттик администрациянын маалымат кызматынан түшүндүрмө беришти.

"Президент Садыр Жапаров жакында көзүнө операция жасалгандыгына байланыштуу имарат ичинде күндөн коргоочу көз айнек тагынып жүрүүгө туура келди. Мамлекет башчысына хирургиялык операцияны талап кылган көздүн төмөнкү жапкагынын энтропиону диагнозу коюлган", - дешти аталган мекемеден.

Энтропион - бул көздүн кабагы менен кирпиктин көздүн карегине карай бурулуусу. Бул көздү тынымсыз дүүлүктүрүп, жаш чыгуусуна алып келет.