"ЭЛДИК КАБАРга" жооп: "Эски мөөрдү жаңысына алмаштырганда шаарда керектүү документтерге басылып жатты" дейт айыл өкмөт башчысы

"ЭЛДИК КАБАР" бөлүмүнө Ош облусунун Кара-Суу районунун Папан айылынын тургуну кайрылды. Ал жаңы шайланган айыл өкмөтүнүн башчысы мамлекеттик мөөрдү жанына алып жүрбөй, кимдир-бирөөгө берип койгонуна нааразы экендигин билдирген.

Бул боюнча Кара-Суу районуна караштуу Папан айыл өкмөтүнө байланышып, окурмандын билдирүүсү тууралуу сурадык. Анда айыл өкмөт башчысы Нурзаман Алимбеков төмөнкүлөргө токтолду.

"Мен жаңы айыл өкмөт башчысы болуп шайландым. Мөөрдү алмаштырганбыз. Ошондо Ош шаарына алып барып, эски мөөрдү жаңысына алмаштырып жаткан учурда эки-үч күндөй шаарда керектүү документтерге мөөр басылып жатты.

Ал эми мөөрдү баскан адам менин жардамчым болчу.

Азыркы учурда мөөр айыл өкмөтүнүн имаратында", - деп билдирди Алимбеков.