"Кыргыз темир жолу" ишканасы 150 жүк ташуучу вагон жана 3 тепловоз сатып алууну макулдашты

"Кыргыз темир жолу" мамлекеттик ишканасы жарым жылдагы аткарылган иштери тууралуу маалымат берди. Анда жүк ташуунун көлөмүн көбөйтүүгө багытталган иш-чаралардын натыйжасында улуттук компаниянын экономикалык-каржылык көрсөткүчтөрү туруктуу жана стабилдүү катары мүнөздөлөт.

Мекеменин маалымат кызматынан кабарлашкандай, 2021-жылдын биринчи жарым жылдыгында мамлекеттик ишкана тарабынан 3 миллион 471 миң тонна жүк ташылды (2020-жылдын 6 айында - 3 миллион 183 миң тонна). 2021-жылдын 6 айында ишкананын кызматын 118 миң 742 жүргүнчү пайдаланган. Бул 2020-жылдын тийиштүү мезгилине салыштырмалуу 46 миң 786 жүргүнчүгө көп.

"150 жүк ташуучу вагон жана 3 маневрдик тепловозду сатып алууну каржылоо боюнча эл аралык финансы уюмдар менен келишим жетишилип, макулдашуу процедуралары аяктоо алдында. Мындан сырткары эл аралык финансы уюмдары менен кызматташуунун алкагында “Кыргыз темир жолу” темир жолдун жогорку бөлүгүн (рельстер, шпалдар) калыбына келтирүү жана Боом капчыгайындагы көчкүгө каршы галереяны кеңейтүү боюнча иштерин жүргүзөт", - деп айтылат билдирүүдө.