Өлкөдө эл аралык олимпиадаларда байгелүү орундарды багындырган окуучуларга сыйлыктар тапшырылды

Информатика жана биология боюнча эл аралык олимпиадаларда байгелүү орундарды багындырган окуучуларга сыйлыктар тапшырылды. Бул тууралуу Билим берүү жана илим министрлигинин маалымат кызматынан билдиришти.

Маалыматка ылайык, аларга медалдарды жана белектерди министр Болотбек Купешев тапшырды.

"2021-жылдын 19-июнунан 25-июнуна чейин Сингапурда бүткүл дүйнө жүзүндөгү окуучулар арасында информатика боюнча 33-эл аралык олимпиада өттү. Онлайн форматта өткөрүлгөн олимпиадага дүйнөнүн 88 өлкөсүнөн 355 окуучу катышты. Кыргыз өлкөсүнөн 4 окуучудан куралган команда катышты", - деп айтылат маалыматта.

Бардык тапшырмалардын жыйынтыктары боюнча, окуучулар төмөнкүдөй жыйынтыктарды көрсөтүштү:

М.Субакожоев атындагы Нарын лицейинин 10-классынын окуучусу Данияр Бейшекеев, Ч.Айтматов атындагы Бишкек лицейинин 11-классынын окуучулары Ислам Давлетов жана Артур Айдаров, Курманбек баатыр атындагы Жалал-Абад лицейинин 9-классынын окуучусу Тенгиз Беккоёнов коло медалдарды жеңип алышты.

Ошондой эле Кыргыз өлкөсүнүн командасы 2021-жылдын 19-июлунан 22-июлуна чейин Лиссабон (Португалия) тарабынан уюштурулган Биология боюнча эл аралык олимпиадага катышты. Команданын курамында төмөнкү окуучулар болушту:

Бактынур Ажыбаев, Жалал-Абад шаарынын Курманбек баатыр атындагы лицейинин 11-классынын окуучусу;
Элина Рамазанова, Бишкек шаарынын №56 мектебинин 11-классынын окуучусу;
Дмитрий Доценко, Чүй облусунун Жайыл районунун Жайыл баатыр атындагы лицейинин 10-классынын окуучусу;
Арген Азанов, Талас шаарынын "Манас Ата" лицейинин 10-классынын окуучусу.

Олимпиаданын жыйынтыктары боюнча Курманбек баатыр атындагы Жалал-Абад лицейинин окуучусу Бактынур Ажыбаев коло медалды багындырды.